غمگین ترین متن مداحی نوحه و روضه ترکی وفات حضرت معصومه سلام الله

۱,۳۸۴
۰
۰
یکشنبه, ۱۰ آذر ۱۳۹۸ ۱۴:۵۲

متن مداحی روضه و نوحه سینه زنی ترکی شهادت حضرت معصومه سلام الله علیها

متن مداحی ترکی زبانحال حضرت معصومه (سلام الله)

قم شهرینه ایله گذر فرصتدی قارداش

جان اوسته معصومه سنه حسرتدی قارداش

یرده یوزوم، یولدا گوزوم، سینمده نامه

من بی کسی قان آغلادان فرقتدی قارداش

عالم سنی غمده منه یولداش یازاردی

بو شرح حالی یوزده کی قانیاش یازاردی

گوزیاشیم آخدوقجا یوزه قارداش یازاردی

قارداش دیوب من آغلارام مدّتدی قارداش

سنگ فراقی چرخ دون آتدی اوزاقه

آدون دلیمده، روز و شب یاندوم فراقه

تا یِتمه میش من وصله، جان یتدی دوداقه

ایلوم نه چاره من یازی قسمتدی قارداش

وادی غمده دردیمه حیران قالاردیم

هردم بو زخم فرقته مرهم سالاردیم

گوزیاشلی نامندن سنون عطرون آلاردیم

دائم منه بو ناله هم صحبتدی قارداش

غمدن اَرینمیش بیر بدن قبره آپارّام

سندن نشانه بیر محن قبره آپارّام

بو نامه نی سینمده من قبره آپارّام

من بی کسه بو مایه ی عزّتدی قارداش

زوّار قبروندن گَلر توشه گوتورسون

آندور بو ناکامی اولار کامه یِتیرسون

قبرون توزوندان قبریمه بیر آز گَتیرسون

عطرون آلوم گوگوم سنه حسرتدی قارداش

باجی ویرنده جان، کسر قارداش کنارین

ویران اولِیدی گردش دور مدارین

سن طوسی مسکن ایلدون، من قم دیارین

یوخ چاره، بو غم جانیمه منّتدی قارداش

عشقونده بیمارم ولی من بی طبیبم

نه بیر گَلن وار نه گیدن آخِر غریبم

ایتمم گله ایلدن بو گون من بی نصیبم

غربتده جان ویرماق بیزه عادتدی قارداش

واردور یری بو غم شرر دنیایه سالسون

حقّ ایتسوب حسرت منیم گوگلومده قالسون

خوشدور باجی باشین دیز اوسته قارداش آلسون

هجران ملالی بیر یامان محنتدی قارداش

شاعر : مرحوم اعظمی

بیشتر بخوانید::

50 متن و پیام جدید وفات حضرت معصومه

متن مداحی وفات حضرت معصومه از جواد مقدم و امیر عباسی


متن مداحی روضه ترکی در احوالات حضرت معصومه (سلام الله)

گل ای فراقی منه درد بی دوا قارداش

دوشوب نه حالته معصومه گور رضا قارداش

نه مدت اولدی سنون گوزلدیم وطنده یولون

حجازه گلماقووی ایلدیم رجا قارداش

نقدر گون گچوب آیلار دولاندی یتدی ایله

نه بلکه هر گونی بیر ایلدی گوئیا قارداش

بو ایلدی باشه یتیشدی ایکی ایل اولدی تمام

که ایلدیم گجه نی گوندوزی نوا قارداش

گونوز دئدیم بو گجه ماه انوریم گله جاق

جهان تیرم اولور عالم ضیاء قارداش

گجه دیدیم گونوز اولسا گونوم طلوع ایلر

ویرر شعاعی دل زاریمه صفا قارداش

او قدر شام و سحر انتظارووی چکدیم

امیدیم اولدی منیم یاس مطلقا قارداش

هوای طوسیله آخر وطندن آیریلدیم

بو فکریله ایلدیم ترک اقربا قارداش

دیدم بو نئشه ده قوم و قبیله دی ایلدن

منه کفایت ایدر بیر او مه لقا قارداش

خیال وصلیویله من بو چوللره دوشدوم

باشیمدا بیلمدیم اما که وار قضا قارداش

فشار درد فراقونله هم ازل گوندن

مریضیدیم من رنجور و مبتلا قارداش

اوزوم محن زده یول زحمتی خسته بدن

علاوه شغلیمدی دمبدم لقا قارداش

بو شهرده نچه گوندور توقف ایلمه لی

نه گون , گجه گونوزوم تیره بیر مسا قارداش

محالیدور داخی بو یردن ایلیم حرکت

بدندن ایله که مسلوب اولوب قوا قارداش

غم فراقوه بولمم که آغلیوم من یا

بو حال غربتیمه ایلوم آه و وا قارداش

نولوردی که بیر دم ایدیدی دیار طوسه گذر

پیامیمی یتوریدی سنه صبا قارداش

گلنمدیم داخی من سن اوزون یتور باری

چتین دگل سنه ای حجت خدا قارداش

قالوب یولوندا گوزوم حسرتیله جانویرورم

ئولم بو حسرتیله اولما سن رضا قارداش

ولیک رسمیدور عالمده جان ویرنده باجی

گرک یانیندا اولا صاحب وفا قارداش

گوزوم یوزینده اگر جانستانه جان ویرسم

کمال لطف اولی چوخ شان پر بها قارداش

بو صون نفسده که وردیم رضا رضا دی منیم

سسیمه ویرمیه سن سس دگل روا قارداش

شاعر : مرحوم ذهنی زاده

بیشتر بخوانید::

غمگین ترین متن و پیام وفات حضرت معصومه

13 متن مداحی وفات حضرت معصومه از مداحان معروف


متن نوحه ترکی در احوالات حضرت معصومه (سلام الله)

گل ای سالان منی بو ورطه ملاله رضا

بلای عشقه قیلان گوگلیمی حواله رضا

ائدوبدی حق منِ فرقت کشیده نی نومید

او خط و خال و کمالُ او مه جماله رضا

هوای وصلویله چشم زاریم ائتمز خواب

دوشنده لذت صحبت لرون خیاله رضا

که قورخورام فلک کجمداره صورتدن

فراقه قید اولونام یتمییم وصاله رضا

سبب بو امره ندور شهره طوسدن گلمز

نه قاصدون،نه پیامون،نه بیر رساله رضا

گئجه سمایه یتور دود و نالهٔ آهیم

گونوز فغان چکرم آغلارام بو حاله رضا

گلور نوایه تقی پرشکسته بلبل تک

سرشک چشمین ائدر گل یوزینه ژاله رضا

ائدن عیالیوه حسرت سنی الهی گوروم

یوزی قرا اولا حسرت قالا عیاله رضا

سنی جلای وطن دربدر سالان ظالم

دچار اولا غضب قهر ذوالجلاله رضا

وفات ائدنده آلیدون باشیم دیزون اوسته

وئرنده جان باخایدوم او خط و خاله رضا

نه خوش زمانیدی اوغلون تقی سنیله ائده

گلوردی راز و نیازِ خوش اتّصاله رضا

امید اوزیله قویوب فایض دل آرامیم

عنایت و کرموندی گلوب سؤاله رضا

مرحوم دخیل مراغه ای

بیشتر بخوانید::

متن روضه و نوحه وفات حضرت معصومه سید مهدی میرداماد

گلچینی از غمگین ترین متن و پیام وفات حضرت معصومه (س)


متن نوحه ترکی وفات حضرت معصومه (سلام الله) سبک : حال دلم از رنگ چشمام معلومه :: سیب سرخی

غصّه لر آخر منی دلدن سالوبدی

تاب و توانی بوتون الدن آلوبدی

اجل گلیب سراغیمه _ یتوبدی جان دوداقیمه

بو غربت اولکده _باجون غریب _ قالوبدی

سندن اوزاق قارداشیم غربتده من قالارام

باغره باسوب نامه وی بوندان عطرون آلارام

حسرتیله هجرونده یاندیم ایوای یا غریب الغربا

بو دم آخرده گلِیدون ای کاش باشیم اوسته ای اخا

مست می جام ولای حیدرم

آل عبانون قاپوسیندا نوکرم

منده داخی یوخدی دوزوم _سوریه ده واردی گوزوم

مقصدیمه یِتیم _ حقّدن _ ایسترم

مظهر لطف و جود و سخا _ معدنِ کُلِّ وجود

لطف ایله تا تز محو اولا بو _ داعش و آل سعود

شهد شهادت جام ولادن_ عشقیله من ایچرم

مدافع حرم ایله منی من _جان و دلدن گیچرم

شاعر : بهمن جعفری زینجناب

بیشتر بخوانید::

متن مداحی وفات حضرت معصومه از میثم مطیعی

18 متن روضه و نوحه وفات حضرت معصومه از مداحان معروف


متن نوحه سینه زنی ترکی زبانحال حضرت معصومه (سلام الله) سبک : کربلا کربلا اللهم الرزقنا

صبا یتور قارداشیما شوقی دوشوبدی باشیما

هایاندادی تِزلی گَله امان وئره گوز یاشیما

گَل رضا گَل رضا یا غریب الغربا

گَل رضا گَل رضا یا معین الضعفا

گَل رضا گَل رضا _ اجل گلیب سراغیمه

بو صون نفس یتیر اوزون _ یتیبدی جان دوداقیمه

گَل رضا گَل رضا یا غریب الغربا

گَل رضا گَل رضا یا معین الضعفا

باجون بد غربت اولکَدَه __ گوزین تیکیبدی هی یولا

جان اوسته دی یوبانما گَل __ جانیم اولا سنه فدا

گَل رضا گَل رضا یا غریب الغربا

گَل رضا گَل رضا یا معین الضعفا

یانا یانا رضا دیوب __ فنا جهاندا آغلارام

عُذاره اشگ آلیمی __ بو صون نفسده باغلارام

گَل رضا گَل رضا یا غریب الغربا

گَل رضا گَل رضا یا معین الضعفا

بو رسمیدور که هر باجی __ وئرنده جان امیدیله

هایاندا اولسا قارداشیم __ دیر گَلَر کناریمه

گَل رضا گَل رضا یا غریب الغربا

گَل رضا گَل رضا یا معین الضعفا

درده دچار اُولدوم اَخا __ درده نتایج قیزیام

بو منصبیم بسدی منه __ باب الحوائج قیزیام

گَل رضا گَل رضا یا غریب الغربا

گَل رضا گَل رضا یا معین الضعفا

گَلَمّیرم، مریضیَّم __ اودور اوزاقدا قالارام

بو نامه وی باغره باسوب __ عطریوی بوندان آلارام

گَل رضا گَل رضا یا غریب الغربا

گَل رضا گَل رضا یا معین الضعفا

بو نامه یادیمه سالوب __ گرک دِیَم بو مطلبی

قلم دولاندی سوزیله __ یادیما سالدی زینبی

جان یارالی جان یارالی جان سنه قربان یارالی

صون نفسینده غصَّدن __ چوخالدی درد و شور و شین

او قانلی کوینکی باسوب __باغرینه سسلدی حسین

جان یارالی جان یارالی جان سنه قربان یارالی

گل حسین ،گل حسین __ وفالیَم ،وفالیَم

قوجالمیشام، یورولموشام _ غصّه لیَم ، بلالیَم

جان یارالی جان یارالی جان سنه قربان یارالی

شاعر : بهمن جعفری زینجناب

بیشتر بخوانید::

متن مداحی وفات حضرت معصومه از محمود کریمی

متن مداحی حسین سازور در وفات حضرت معصومه


متن روضه ترکی زبانحال حضرت معصومه (سلام الله) به حضرت امام رضا (علیه السلام)

ای رضا جان داده گل سینه سی سوزان باجیوام

اورگیم تنگه گلوب روحی پریشان باجیوام

شهر قمدا یانیرام درد فراق و محنه

یوخدی بیر گوگلوم آلان گوزلری گریان باجیوام

رسمیدی گل باشینا عشقیله بلبل دولانار

گل سنون باشیوا دونم گل خنندان ، باجیوام

دوزدی غربته ئولن شخصه اخا یار اولماز

یوخدی سنسیز گلنیم قارداشا قربان باجیوام

شاهدیم گویده ستاره نجه قان اغلیارام

تیر محنت ائلیوب بو اورگی قان باجیوام

گر خسوف ایلسه ماه گویده کی اولدوزلار آخار

من دالینجا آخارام ای مه تابان باجیوام

آخی غربتده رضا یوخدی سیلن گوز یاشیمی

گوزلریم یولدا قالوب بی سر و سامان باجیوام

هر باجی گوگلی اولار جانی چیخان لحظه گله

قارداشی باشینون اوسته ، گل رضا جان باجیوام

باجیوین درد و دلی چوخدی باشا گلمز اخا

دردیمی ایلمیشم سینه ده پنهان باجیوام

گوزلریم ابری بهار مثلی دولار هی بوشالار

سوزولری ایلیرم منه سنه عنوان باجیوام

ایندی دای جان دوداقه چاتدی آلور گتمگه یول

اجله یالوارورام صبر ائده بیر آن باجیوام

گل رضا گل باجی قربان گل گوزوم یولدا قالوب

منی گوزدن ولی آتما سنی قرآن باجیوام

ای قلم چک سوزی زینب قالان احواله الان

باشیمه ماتم و غمدن دوتولوب هاله الان

جان وئرن لحظه ده زینب گوزی گوزلوردی یولی

هی دئیردی باجیوی یادیوه سال آی قارداش

زینبم ،دردین حسین چوخ قوجادیبدی باجیوی

بو رسا قامتیمی ایلدی دال آی قارداش

دوزدی باجی باشینی قارداش اوجالدار آی حسین

بو سینان قلبیمی عباسیله آل آی قارداش

گلمه سن بزم عزامه، خار اولار مجلس غم

تیر غربت اروگه سالمیشی خال آی قارداش

گل ابوالفضلیله اولسا دئنن اکبرده گل

باشیمون اوسته ئولونجه ولی قال آی قارداش

گر گله فاطمه باش اوسته دئنن زینبیوه

دئگینن لای لایی بیرده منه چال آی قارداش

ای «خدایی» روز محشر دئیر حتماً زینبلطفیله نوکریوی یادیوه سال آی قارداش

بیشتر بخوانید::

متن مداحی وفات حضرت معصومه از سیب سرخی

متن مداحی جدید وفات حضرت معصومه


احوالات حضرت فاطمه معصومه (سلام الله)و گریز به احوالات حادثه کربلا تا شهادت حضرت رقیه (سلام الله)

مرحوم سعدی زمان در حاشیه این ابیات علنأ

برای کسانی که لیاقت خواندن این ابیات را در خود نبینند و

بدون داشتن لیاقت آنرا بخوانند علنأ لعن خدا و انبیا و اولیا را

بر آن شخص خواستار شده اند!ولیکن ما بجهت ناقص نشدن ابیات

مرحوم سعدی زمان رضوان الله تعالی علیه، آنرا ذکر کردیم.

بو سوز که نظم ائلیوب ناظم وفا کردار

یازور همین خبری راویان خوش آثار

تصرف اولسا بیر آز لفظ ده دگول غفلت

زبان حالیدی اولماز منافی عصمت

که شهر طوسیده بیر گون شهید زهر جفا

قالان عیالینه حسرت غریب امام رضا

ز بسکه تنگه گلوب ابتلای غربتدن

دولوبدی قانیله گوگلی بلای غربتدن

او شاه دین وطن و عترتین سالوب یاده

توکوب سرشک بصر, نی کیمی گلوب داده

سالوب مدینه پیغمبری خیاله امام

مجسم ایتدی بنی هاشمی نظرده تمام

ویروبدی یوز غم و محنت او شاه مهمومه

علاوه یادینه دوشدی باجیسی معصومه

بلوب که آز قالوری عمر گلشنی سولسون

یاخوندی گلسون اجل حال احتضار اولسون

بو فکره دوشدی او حالین باجیسی بلسون

که زهر وئرسله معصومه نی گوروب اولسون

یانیقلی قلبیله آلدی الینه بیر خامه

یازوبدی باجیسینا گوز یاشیله بیر نامه

نه نامه صفحه قرطاسی اودلانان دلیدی

دواتی گوزلرینون جامی گور نه نسگلیدی

مرکبیدی گوزیندن آخان جگر قانی

او نامه نین غمیله باشلانوبدی عنوانی

ایدوم ننوعیله تقریر او حالی یا الله

مطالیبیدی همان نامه نین فغانیله آه

وفا خطین او زمان لوح سینه ده قازدی

زبانحالیله معصومیه بیله یازدی

گل ای بلاکش دور زمانه معصومه

منه آنامدان اولان بیر نشانه معصومه

گتوردی ای باجی مامون منی خراسانه

عداوتین گتوره تا عیانه معصومه

آیوردی دور فلک ظلمیله منی سندن

بو غصه دن جگریم دوندی قانه معصومه

منی بو اهل جفا آخر ئولدورله یقین

که آختارولا منه چوخ بهانه معصومه

ویره له زهر جفا عاقبت آنام باجی

قویار سنی بو غمیم یانه یانه معصومه

دوشوبدی یادیمه اوغلوم تقی یانار جگریم

واریمدی شوق لقا اول جوانه معصومه

باجی اماندی اوزون تیز یتور خراسانه

یاخوندی گلشن عمریم خزانه معصومه

ویرنده جان سن اوزون باغلا بوردا گوزلریمی

که حسرتم گوزیمی باغلیانه معصومه

آتام قراسینی باشوندان آچما قوی قالسون

یاخوندی دونماقا قدون کمانه معصومه

او قدر قالموری قارداش قراسینی گیئه سن

تیز اولگلان بو دیاره روانه معصومه

غرض او نامه نی یازدی امام کون و مکان

مدینه سمتینه بیر قاصدیله ایتدی روان

گلوب مدینیه قاصد یتوب تمنایه

یتوردی نامه نی دولت سرای والایه

کنیز آلوب اونی معصومیه او دم یتوروب

خانم گورنده همان نامه نی اوزون ایتوروب

هنوز نامه آچیلموب اوخنمیوب سطری

او نامه دن گلوری گوردی قارداشین عطری

باسوبدی باغرینا اول توکوب یوزه قانیاش

چکوب بیر آه جگردن دیدی که جان قارداش

اوپوب دوباره قویوب گوزلرینه ائتدی فغان

یانا یانا دیدی جان عطروه باجون قربان

امام نامه سین آچدی او برج عصمته ماه

اولوب او وقتیده مضمون نامه دن آگاه

سفر تدارکی گوردی اوزینه چون لازم

اولوب وفالی خانم طوس شهرینه عازم

قرار و صبرینی قارداش محبتی آلدی

امام عترتی گتدی اونی یولا سالدی

چخوب مدینه دن عزتله اول نجیبه دهر

خیال وصلیله گزدی دولاندی شهر به شهر

ایدوبدی محنت هجران ز بس دل افسرده

اولوب مریض خانم گون به گون گلوب درده

گلوب او حالیله تا ساوه شهرینه یتدی

امید وصلینی دست فراق یاس ایتدی

حیات گلشنینی غم سمومی سولدوردی

رضا دیدی گوزی اشک تریله دولدوردی

قضا الی خانیمی قویمادی وصاله یته

دیار طوسه گیده دلده کی خیاله یته

تب عارض اولدی گل باغ احمدی سولدی

بهار عمری او تازه گولون خزان اولدی

گون اولدی شدت تبدن قرا گئجه گوزینه

جوانلیقیندا دوزولدی اولوم تری یوزینه

نهال قدین ایاقدان سالوب تب لازم

دوشوب بو فکره اولا قم دیارینه عازم

بو بیر خبردی اوزی قصد ایدوب قما گیتسون

که بلکه اوردا تب لازمه علاج ایتسون

ولی بیر آیری خبر وار صحیحدور بوندان

دئیم گرک اونی بو قول قالمیا پنهان

قم اهلی باخبر اولدی که اخت حجت حق

ویروبدی یمن قدومیله ساویه رونق

توافق ایلدیله آل سعدیله یکسر

او شهره عصمت علیانی دعوت ائتسونلر

بیوک کیچیک هامی ائتسونله ساویه هجرت

ولیه اللهی ایتوسونله میهمان دعوت

همان مخدریه ایلسونله چوخ اجلال

گلنده شهره اولونسون بویوک بیر استقبال

بو امر خیره اولوب آل سعددن سبقت

که ایلسونله تشرفله کسب حیثیت

تشعیین شرفین ایلدی جهانه علن

ازل حضورینه موسی بن خزرج اولدی گلن

بولوردی فاطمه شمس الشموسه سویگولودی

ز بس عفیفه دی موسی بن جعفرین گولودی

بلوردی وار او خانمدا نجه علو مقام

خبر بو مطلبی ویرمیشدی آلتیمینجی امام

ری اهلینه بیله فرمایش ایلمشدی او شاه

که کردگاره حرم دور جهاندا بیت الله

رسول حقه ده وار بیر حرم بو دنیاده

آدی مدینه دی جدیم یاتوب او ماواده

آتام علی ولی نینده واردی بیر حرمی

دئیه له کوفه بی بیم زینبین محل غمی

همان او شهریدی کوفه آدی گلنده دله

گورور اورک گوزی بیر قانلی باش باتوبدی کوله

نه باش که طعنه ورار نوری مهر رخشانه

محاسینی بلشوب تل به تل قیزیل قانه

نه باش که نطقی قویوب اهل عالمی حیران

جداده قانه باتان لبلری اوخور قرآن

نه باش جداده یوزه قانلی گوز یاشی آخوری

آچوخدی گوزلری اوز اهل بیتینه باخوری

نه باش صبا یلی دگدوقجا آرترور رقّت

ایدور صاقا صولا قانلی محاسنی حرکت

نه باش که چولقالیوب گر چه یولدا گرد و غبار

ولی گینه یوزینون نوری مهره طعنه وورار

نه باش او باشدان اولور نور گوگلره ساطع

باخان دیر سر نی دن اولوبدی گون طالع

نه باش که نیزه ده کهف آیه سین ایدوب از بر

اوخور معاینه آیات کهفی پیغمبر

باخان دیور بو نه هنگامه دور نه مطلبدور

بو قانلی باش اوزی اول ماجرادن اعجبدور

توکور صحیفیه بو نظمدن شراره قلم

حسینی قویما که سوزده چکه کناره قلم

رئیس مذهب حق یعنی جعفر صادق

ری اهلینه بو بیاناتیله اولوب ناطق

خدای عالم و آدم , قدیر و فرد و امین

بیز اهلبیتینه ایلوبدی بر حرم تعیین

او قمدی آزدی نظیری جلال و عفّتده

او یرده دفن اولاجاق بیر بالام او تربتده

منیم همان بالامین اسم پاکی فاطمه دور

آناسی تک اونا حور بهشت خادمه دور

زیارت ائلسه هر کیم اونی او تربتده

بهشت واجب اولار اول کسه قیامتده

ز بس عفیفیدی عصمتلیدور او مهمومه

اولار ملقّبه خلقین ایچینده معصومه

همین بو فکریله موسی بن خزرج اعلم

مشرف اولماقا پابوسه اولدی پیش قدم

مهار ناقه سین آلدی اله محبتدن

یر و گوی اهلینه فخر ایلدی بو خدمتدن

او اون آقاج یولی که گیتدی گاه دینجلدی

تمام عزتیله قم دیارینه گلدی

یتیشدی شهره چون اول خواهر ولی الله

بو حالدن اولوب اول ساعت اهل شهر آگاه

تقّدم ایلدی تکریمه جمله خورد و کبار

چکلدی جار همان گونده باغلانوب بازار

امام باجیسینی سرفراز ایلدیلر

غریبه عزتیله پیشواز ایلدیلر

او گون اولوندی او علیا جنابه چوخ حرمت

آپاردی محملینه چرخ کبریا حسرت

گلوب تکلمه موسی بن خزرج آگاه

دیلینده ازبر ایدوب لا اله الا الله

ووراندا باشینه شوق ولایتین شوری

اوخوردی لحن حجازیله آیه نوری

امام باجیسی هر یردن ایلینده عبور

چکردی جار اوجا صوتیله او مرد غیور

بیلون بو کیمدی، بو فردوس عَدْن زیوریدور

اوزی امام قیزی هم امام خواهریدور

نهال باغ امامتده تازه بیر بَردور

باباسی ختم رسلدور آتاسی حیدردور

گل بهشتیدی خاتون دار عقبادور

آتاسی موسی کاظم آناسی زهرادور

بو سوزلری ایشیدوب اهل قم صغیر و کبیر

ویروبله سس سسه بیردن دیردیله تکبیر

کجاوه سین گورن ایلردی یاخشی حرمتلر

چخوبلا بام لره گل سپردی عورتلر

آلیشدی یاندی جگر آه یا امام زمان

بیلنمورم نیه بس شام اولمادی ویران

امام باجیسی گر اولسا بیر عورت

اونا زمانه ده ایلله بئله بیر حرمت

امام باجیسی یوخسا دگولدی زینب زار

گیرنده شامه او خاتون روزگار مدار

اونادا ایتدیله شام اهلی یاخشی حرمت لر

سیزیلدییاندا خانم کول توکردی عورتلر

یاناندا قلبی توکنده عذارینه قانیاش

سیزیلتیسین ایشدوب بامیدن آتاردیلا داش

یول اوستونه دوزولوب شامیان صف اندر صف

آچوب شماتته دل وجدیله چالاردیلا دف

اونو کجاوه سینه قمیان آتاردیلا گل

بونون کجاوه سینه شامیان توکردیله کول

اونی گورنده اولوردی نثار عطر و گلاب

بونی گورنده ولی دف چالاردی اهل عذاب

اونا دئیردیله بو تیره شام گوندوزیدور

بونا دئیردیله شام اهلی خارجی قیزیدور

نه یوز ویروب دئیله بیللم او زار و مهمومه

غرض دیوم نه اولوب وضع حال معصومه

یتوبدی شهر قما اخت سرور باذل

ایدوبدی خانه موسی بن خزرجی منزل

مخدرات خبردار اولوب که دخت امام

او یرده منزل ایدوب گلدیلر حضوره تمام

مشرف اولدولا پابوسه ازدحامیله

اوپوبله ال ایاقین جمله احترامیله

نوازش ایتدیله حالین سوروشدولار یکسر

ایاقینه یوزینی قویدولا مخدره لر

همیشه صانع بی چون عالم امکان

مصون بلادن ایدوب ایلسون قمی آباد

بونون مقابلی خلاق عالم امکان

گوروم همیشه ایده شام شهرینی ویران

گوروبدی حضرت معصومه قمدا چوخ اجلال

و لیک زینب اولوب شامده پریشانحال

قوناقیدی او خانیمدا اهالی شامه

هزار حیف که دوندردیلر گونون شامه

غریبه ایتدیله حرمت او فرقه باطل

عقیله العربه ویردیلر عجب منزل

گتوردولر او دل داغدیده سین درده

اسیر گوردوله یر ویردیلر قوری یرده

بولوبله خسته دی یولدان گلوب او دلخسته

گلوبله دیدینه شام اهلی دسته به دسته

نه حرمت ایتدیله یوخ دلده شرحینه یارا

چوخ اعتذاریله بسدور اشاره یا زهرا

بیلیردیلر که اولوب قارداش باتوب محنه

ویره له تسلیت عالمده قارداشی النه

گله گله دل آچوبلار تمام تسلیته

امام عصر یانار ایندیده او تعزیته

عزیزه حرمه یاخشی خوش صفا دیدیلر

شماتته دل آچوب حرف ناسزا دیدیلر

بوله بوله بونی خاطرلیدور او مظلومه

حنالی اللری گوستردیلر او مهمومه

امام عصرین آلار بو قضییه طاقتینی

آچوخ گر عمه سینین عرض ایدم مصیبتینی

ویرولسه شرح خانم زینبون مصائبینه

یتر مصیبت و غم ذوالفقار صاحبینه

گیچاخ بو مطلبی یتمز تمامه محنت شام

گرک قضیه معصومه نی ایداخ اتمام

اولوبدی دیده معصومه ده جهان تاریک

مرض اریتدی اولوب جسمی نی کیمی باریک

گوزینده غم بو جهان وسیعنی تنگ ایلدی

خانم او شهرده اون یدی گون درنگ ایلدی

وفالی قارداشینا عشقینی نشان ویردی

رضا دیدی گوزی مروین یولوندا جان ویردی

رضا یولوندا قالان منتظر گوزین یومدی

شناگر یم غم، بحر رحمته جومدی

عزا بساطی قوروب اهل شهر اناث و ذکور

و لیک ایلیوب عورتلرین نواسی وفور

باخوب جنازیه رخصت ویروبله گوز یاشنا

گوروبدیلر که قویوب اللرین ئورک باشینا

ایکی الین گوتوروب رد ایدنده جامه سینی

اورک باشندا گوروبلر امام نامه سینی

زمانه ده باجی قارداش اگر چه چوخ چوخدور

بئله وفالی باجی هئچ نشان ویرن یوخدی

اولان بونون کیمی قارداشینا وفا کردار

منیم زمانه ده بیر باجیدا سراغیم وار

او کیمدی حالینی من ایلینمرم تحریر

ولی وفاسینی بیر شمه ایلیوم تقریر

بلالره آچیلان گونده مکتب تعلیم

او گون اولوب بونا تشکیل مدرسه تسلیم

خدای عشق بلوردی اوزی لیاقتینی

جهانیانه ولی بیلدیره جلالتینی

بلا و محنت عشقه گوروب ز بس که جدیر

گتوردی ایلدی دارلفنون عشقه مدیر

بیری گر ایستسه تعلیم آلا کتابت عشق

گرک گلوب آلا بوندان زمانه ده سر مشق

وفاسینی ایشیدوب قلبون اولدی چوخ مشعوف

اولوم معرف اونا تا سنه اولا معروف

آدین صریح دیوم قالماسون نهان مطلب

عقیله العرب علیا مکرمه زینب

وفا و مهر یولوندا جلالیدن ال اوزوب

تمام غملره قارداش محبتینده دوزوب

دیریلیقیندا وفاسین بونون هامی بلدی

الن زماندادا فکر حسینیله الدی

ضعیف اولوب اریوبدور وجود مجروحی

حسین دیه دیه جسمیندن آیریلوب روحی

جهانی حیرته سالدی بو درد و محنتلر

یغیشدیلار ویرللر تا که غسل عورتلر

خیال ایدردیله درد دل مکدرینی

گوروبدولر که باسوب سینه سینه اللرینی

بریسی دیده ده موج سرشگی سد ایلدی

تکان ویروب خانمون اللرینی رد ایلدی

ایدوب او حالتی قلب جهانیانه اثر

گوروبله اورداکی عورتلر ایلینده نظر

نقود عشقی یغوب دُرّ تک خزینه سینه

باسوبدی قارداشینون کوینگینی سینه سینه

نه کوینک عالم امکاندا رتبه ده تک دور

آناسی فاطمه نی آغلادان او کوینک دور

نه کوینک عالم آرا یوخ نظیری عزتده

بهشت عدنده ده یوخ لباس او قیمتده

نه کوینک البسه خلددن گوزل یلمق

نظیر اولانماز اونا سندسیله استبرق

نه کوینک ایلر اونا غبطه گیسوی حورا

گلنده حشره سالار باشینه اونی زهرا

نه کوینک اولموش اونون تار و پودی مایه غم

تیکر او کوینگه گوز حشرده هامی عالم

نه کوینک اولسا کلیسایه بیر تلی زیور

شرفده بیت خدایه کنشت فخر ایلر

نه کوینک عالمه او نشر ایدوبدی قرآنی

مین اوچ یوز ایلدی سویوبلار یوولمیوب قانی

نه کوینک آغلادار عصرین امامین اول کوینک

سویولمیوب ایمدیه دین بیر لباس او کوینک تک

نه کوینک اولماز اونون قیمتی ایکی دنیا

حسین او کوینگی گیمیشدی روز عاشورا

نه کوینک عالمیانه مبشر رحمت

او کوینک اوسته حسینه یتیبدی چوخ محنت

نه کوینک اوخ یاراسیندان اولوبدی صد پاره

همان او کوینک ایدوب زینبی گونی قاره

نه کوینک اولسا اجازه بتول عذرادن

آچار منیم قلمیم پرده بو معمادن

او قدر صاحبینه اوخ قلج وروب اعدا

اولوب مشبک او ثوب عتیق سر تا پا

اجازه ویرسن اگر یا بقیه الاخیار

اشاره سین ایدرم خاکپایوه اظهار

یارالارین قانی یکسر قمیصی دوتموشدی

گون ایستیسی بدنه ضم ایدوب قوروتموشدی

یانان دلی اویولوب جدوین او کوینگیله

دری لری سویولوب جدووین او کوینگیله

او پیرهنده نه وار ای تمام عالمه رب

فقط اوزون بیلوسن بیرده بینوا زینب

باسوبدی باغرینا علت ندور او مظلومه

ویریلسه شرح قالار شرح حال معصومه

او گونکه قمدا گل باغ بوتراب سولوب

جوار رحمته معصومه روحی واصل اولوب

ایشیتدیلر که اولوب خواهر امام غریب

گوروندی شهریده بیر شور و ازدحام غریب

مخدرات گلوب نی کیمی نوا دلده

ویروبله غسل اونا وا محمدا دیلده

عزا بساطی قوروبلار غریب اولن خانما

تمام عزتیله ایتدیلر کفن خانما

دیدیله قارداشی یوخ بوردا اشکبار اولسون

گلون عزاسینی بیز قویمیاخ که خوار اولسون

ویروبله سس سسه آهیله سینه داغلادیلار

دویونجا اوخشادیلار بیر دویونجا آغلادیلار

اولا جنازه سینین احترام و تجلیلی

اوجالدی اهل قمین جمله بانک تهلیلی

نوا و ناله تهلیلیله فضا دولدی

گوتوردولر جسدین بابلانه نقل اولدی

بو بابلان هارادور عرض ایدوم اولون آگاه

همان او یردی که ایندی اولوب زیارتگاه

همان او یردی گوزل گنبد و مناره سی وار

باخان دئیر که فلک دور مه و ستاره سی وار

همان او یردی گیدر پاک شیعه فوج به فوج

او یردن ایلر اذان و دعا سسی گویه اوج

او نعش طاهره نی گتدیلر اورا احباب

درست ایتدیله دفن ایلماقه بیر سرداب

بو مطلب اولدی ولی آل سعده مایه غم

ذکور طائفه سیندن یانیندا یوخ محرم

بو بیر خانیمدی که بوندا بویوک جلالت وار

بونی مزاره قویا کیمده بو لیاقت وار

او کیمدی رخت علایق وجودیدن سویسون

گیروب مزاره آچوب صورتین یره قویسون

بو باره ده چوخ اولوب صحبت و سوال و جواب

صلاح کاری گوروب بوندا عاقبت احباب

که وار قبیله ده بیر خادم فرشته ضمیر

تقی و اورع اهل قبیله چوخ چوخ پیر

مطیع قادر قهاردور آدی قادر

سفارش ایلیه لر تا گلوب اولا حاضر

قویا امام قیزین قبره قالمیا یرده

گینه گتوردی بو سوز غملی قلبیمی درده

ندن امام حسینون قیزی رقیه نی بس

خرابه ده قویا قبره تاپولمادی بیر کس

باخوب او حاله یانوب اهل عالم لاهوت

نه بیر کفن گتورن نه تاپولدی بیر تابوت

غرض سفارش ایدوب اهل قم گله قادر

ولیه اللهی دفن ایتماقا اولا حاضر

بو حالده نه گوروبلر که رمله سمتیندن

غبار قوزانوب اولدی ایکی سوار علن

او نعش جانبینه گلماقا ایدوله شتاب

و لیک هر ایکیسی صورته سالوبلا نقاب

گلوب یتیشدیله تعجیل بی نهایتبله

پیاده اولدولا چوخ وقریله شهامتیله

نماز قیلدیلا اول کان عصمته اول

اولوبلا داخ سرداب خاص مستعجل

مزاره قویدولا دفن ایتدیله مخدرنی

قیتدیلر گنه گلدیقلاری یولا علنی

اولار نه ایلدیلر کشف پرده صورتدن

نه بیر نفر تانوری بیر ایله جماعتدن

ایکی سواره آدین گرچه یازمیوب اخبار

منیم ولی اوزومون بوردا بیر عقیدم وار

بودور عقیدم اونی دفن ایدن ایکی آزاد

بیری امام رضا دور بیری تقی جواد

او یرده حاضر اولوب قدرت امامتیله

قویوبلا قبره او خاتونی بو جسارتیله

تمام عز و شرفدور بو دار دنیاده

باجی النده اولا دفنه قارداش آماده

تمام باجیلارین آرزوسی وار ایکاش

النده قویسون اونی قبره مهربان قارداش

خصوص بیر باجی کی قارداشا قالا حسرت

دلنده از بر اولا قارداش آدی بیر مدت

رضا رضا دیدی بو عاقبت رضا گلدی

رضا الیله قویولدی مزاره دینجلدی

رقیه ده چوخ ایدوبدور علی علی ازبر

ندن خرابیه بس گلمدی علی اکبر ؟

نه شاد اولوب آچیلوب قلبی نه یوزی گلدی

علی علی دیدی یولدا قالوب گوزی الدی

اولونجه سسلدی گل هارداسان علی اکبر

اولور خرابه ده باجون سنون یولون گوزلر

بو سهلدور که علی اکبر ایتمدی اونی یاد

قویانمادی باجیسین قبره سید سجاد

صریح یوخدی یازان کیم قویوب اونی قبره

دونه سزادی حسینی لرین گوزی ابره

بو دور عقیدم اونی غسل ویردی زینب اوزی

قابار ایاقلارینا جسمینه ساتاشدی گوزی

هنوز گوردی ایاقینده زخم آبله وار

دیریلیقی کیمی بوینوندا جای سلسله وار

نحیف جسمینه باخدوقجا سینه داغلاردی

دلنده وای بالا وای سس چکردی آغلاردی

گلوبدی گوز یاشی موجه قلم سوزی آزدی

رقیه قبرینی معلوم اولان خانم قازدی

خانملار ایتدی کمک لیک او معدن صبره

قویوب علی قیزی قارداش بالاسینی قبره

خرابه ده نه چکوبدور دیسم او مظلومه

قالار بقیه دفن جناب معصومه

همینکه قبر قویولدی او عصمت علیا

درست ایلدی بیر سقف بوریا موسی

او سقفی ایلدی موسی بنا بو منظوره

که سایبان اولا اول قبر پاک و پر نوره

گونون حرارتی دوشسه او قبره خفت اولور

نظرده خوار اولور قبری, هتک حرمت اولور

امام باجیسی دور چون او قبرده نائیم

مزاری اوسته گرک سایبان اولا دائم

قلم بو یرده حسینی گنه سوزی آزدی

اولونجه شیعه حسینه گر آغلاسا آزدی

اذیتی گونون اولماز مزارده یاتانا

چتیندی گون دوشه بیر عور قانینه باتانا

قالاندا عور یارالی تن امام غریب

تاپولمادی اونا بیر سایبان ویرن ترتیب

گون ایستی قانلی قوم اوستی بدن دولی یاره

بسان گل داغلوبدور او جسم صد پاره

باجیسی زینب کبری گلنده قتلگهه

تعجبیله نظر سالدی بیر یارالی شهه

نه گوردی وار نه باشی نه لباسی پیکرده

لباس سهلیدی یوخدور بیلکده اللرده

گورنده واردی نه باش نه لباس قارداشدا

مدینه سمتینه یوز دوندروب الی باشدا

آدیله سسلدی اوز جدینی او دریا دل

جفای اهل جفادن آچوب شکایته دل

دیدی بابا بو حسینوندی قاننه غلطان

کسوبدولر دالیدان نازنین باشین عطشان

یارالی جسمده واردور نه پیرهن نه قبا

نه واردی خامس آل عباده بیرجه عبا

عمامه سین آپاروبلار ستمله تاراجه

یارالی باشی چخوب نوک نی ده معراجه

گوروب که ویرمدی جدی او بی پناهه جواب

دونوب حسینه طرف ایلدی دوباره خطاب

دی بیر گوروم یارالی سن منیم حسینیم سن

باشیم اوجالیقی عالمده , نور عینیم سن

هدایتین گونی نولدی کی گون کیمی باتدون

سبب نه اولدی نظردن عیالوی آتدون

هدایتین گمیسی نولدی قانه غرق اولدی

غریق بحر بلا جمله غرب و شرق اولدی

تمام عالمه سن دست یاریدون یارالی

ید الله اوغلی ید کردگاریدون یارالی

سنون جهاندا الون اوستونه بر ال یوخودی

مقام عز و شرفده سنه بدل یوخودی

بو خلق آرا سنیدون مظهر حق بی چون

نه اولدی اولدون اراذل النده بیله زبون

تمام عالمه فلک نجاتیدون قارداش

حقیقتا اوزون عین الحیاتیدون قارداش

او قدرتیله تعبد یولون نشان ویردون

قوری دوداقیله باخدون فراته جان ویردون

سوئی سنون یوزوه باغلیان زمان اعدا

اولیدی کاش جهان قانیله دولی دریا

سنون باجون دگل آیا بو خانه سی ویران

کسیلدی چاره سی بالمره قوم و قارداشدان

دولاندیروبدی بقیعه یوزین او کان حیا

یارالی قلبیله ایتدی خطاب یا زهرا

آنا بو قانینه غلطان سنون حسینوندور

یارالی پیکری عریان سنون حسینوندور

همان حسیندی بو گل تک اوپردون ایگلردون

ایدوبله گل کیمی خندان سنون حسینوندور

همان بدنی که سینونده بسلمشدون سن

اولوبدی خاکیله یکسان سنون حسینوندور

بو لشکری داغیلان تخت و تاجی غارت اولان

تمام عالمه سلطان سنون حسینوندور

بو قیزلاری سویولان اهلبیتی چولده قالان

قتیل لشکر عدوان سنون حسینوندور

بو قان ایچینده شناور نجات کشتی سی

نجات عالم امکان سنون حسینوندور

بو قوملار اوسته اوزی قویلی پاره پاره بدن

حبیب خالق دوران سنون حسینوندور

قالان جنازه سی بی غسل و بی کفن یارالی

قویان عیالینی گریان سنون حسینوندور

جواب گلمدی گوردی آناسی زهرادن

هجوم محنت و غمدن دوشوب توانادن

شرار آهیله دنیانی دلکباب ایلدی

مخاطبین دگشوب اوخلارا خطاب ایلدی

بو رسمدور یارالی بی کسی هامی یوخلار

بو یوخلاماقدی مگر ای جگر دلن اوخلار

بو سینه مخزن علم خدای عالم دور

مگر بو سینه مجروحه تیر محرمدور

او هانسی چرخیدی بو پایه ده ستاره سی وار

او هانسی سینه دی بیر بیله قانلی یاره سی وار

گون ایستی پیکری خسته نه ساتر و نه کفن

یانور یارالی بدن یوخدی کیمسه دفن ایلین

مرحوم حسینی سعدی زمان

بیشتر بخوانید::

متن مداحی ترکی شهادت علی بن موسی الرضا

متن جدید مداحی ترکی شهادت امام رضا


متن نوحه سینه زنی شهادت حضرت معصومه (سلام الله)

ای مقدس مدفنی رشک سپهر آبنوس

دختر باب الحوایج خواهر شمس شموس

قم قوام جسمویله کسب ایدوب شآن و شرف

خاکبوسون قصد ایدر اقطار عالمدن نفوس

رشگ فردوس برین دور بو حریم محترم

شیشه افلاک ایدر بو قبه دن اخذ عکوس

ایلدی دعوت سنی طوسه امام هشتمین

ایلدون یثربدن آغلار گوزلی عزم شهر طوس

زینب کبری کیمی قارداش دیوب دوشدون چوله

ساوه شهرینده سنه یوز ویردی چوخ آه و فسوس

بیر مرض یوز ویردی غمگین ایتدی ناسوت عالمین

ایلیوب لاهوتیان بزم مصیبتده جلوس

تا علیله جانیله گلدون خانم قم شهرینه

اهل قم ایتدی بیر استقبال عالی و ملوس

محملون آلدی آرایه مومنین پاکدل

ایتدی بانولر سراسر غرفه دن خارج روس

تا کجاون گوردی هرکس دسته دسته گل سپوب

اهل قم تکریمیله اولدی سراسر پایبوس

پیش رویونده سنون موسی بن خزرج باشلادی

آیه نوری تلاوت ایتدی با صوت ملوس

زینب کبری قباقینجه ولی قارداش باشی

نیزه ده قرآن اوخوردی تا سکوت ایلردی کوس

قمیان ایتدی سنی چوخ عزتیله پیشواز

زینبه اما دیردی خارجی گبر و مجوس

ایلینده داد و شیون عصمت کبری قیزی

تازیانئیله وراردی شمربی رحم و عبوس

ایمدیده زینب غمینده خاک اولوبدور قاره پوش

اهل ماتم تک گیوب گوگلر لباس سندروس

بو ایکی خاتونه (سعدی زمان) یالوار مدام

ایتمسون حالون مشوش دور چرخ آبنوس

مرحوم حسینی سعدی زمان

بیشتر بخوانید::

دانلود ۲۸ مولودی گلچین شده به مناسبت ولادت حضرت معصومه (س)

متن مداحی شهادت امام حسن عسکری از سید رضا نریمانی


این مطلب چقدر مفید بود ؟
 

دیدگاه ها

شما هم می توانید نظرات خود را ثبت کنید



کد امنیتی کد جدید
hits

آخرین مطالب دلگرم