۵ شعر ترکی غم انگیز در وصف شهادت امام جعفر صادق (ع)

۲,۷۹۳
۰
۰
چهارشنبه, ۲۹ خرداد ۱۳۹۸ ۰۹:۳۴
اشعار ترکی غم انگیز در وصف شهادت امام جعفر صادق (ع)، که از این اشعار می توانید به عنوان نوحه سینه زنی، روضه، و زمینه استفاده کنید.
۵ شعر ترکی غم انگیز در وصف شهادت امام جعفر صادق (ع)

اشعار ترکی در وصف شهادت امام جعفر صادق (ع)

شعر شهادت حضرت امام جعفر صادق (علیه السلام)

گریز به شهادت حضرت موسی بن جعفر (علیه السلام)

شیعه لر آغلار بو گون طاها امام صادقه

باش آچوب ماتم دوتوب زهرا امام صادقه

صادق آل محمّد ظلمیله مسموم اولوب

مرتضی سسلر اوغول وای، مجتبی مغموم اولوب

دشمن بی رحم الینده گور نجه مظلوم اولوب

مجلس ماتم قوروب دنیا امام صادقه

دوندروب اهل جفا قانه دل ناشادینی

شدّت زهر ستم صد چاک ایدوب اکبادینی

بی مروّت دشمنی باشسیز قویوب اولادینی

آغلادی دنیا و مافیها امام صادقه

بیر گجه منصور ملعون ایستدی اول سروری

تا یتیرسون قتله ظلمیله ولی داوری

چکدی شمشیری غلافیندن قزاردی گوزلری

تا بو فکریله ایده ایذا امام صادقه

گوردی عالم تیره تار اولدی قیامت آشکار

باش آچوخ یتدی پیمبر مجلسه بی اختیار

بیر طرفده مرتضی دورموش الینده ذوالفقار

لاتَخَف سسلور حق یکتا امام صادقه

گوردی بو اوضاعی منصور اولدی حالی منقلب

قویدی شمشیری غفافه ایلدی کظم غضب

عرض ایدوب گل یانیمه ای سیّد عالی نسب

عطر مخصوصین ایدوب اعطا امام صادقه

عاقبت قتل امامه نفسینی محکوم ایدوب

دلده کی بغض و عنادین عالمه معلوم ایدوب

زهردار انگوریله اول سروری مسموم ایدوب

اولدی بیر ماتم سرا دنیا امام صادقه

ایتدیلر تکفین تشییعینده مردم ازدحام

ماتمینده حاضر اولدی پیر و برنا خاصّ و عام

چوخ جلالیله آتاسین قبره تاپشوردی امام

مجلس ترحیم ایدوب برپا امام صادقه

اولمیوب هارون ایدن ظلم عالم امکانیده

یانمادی موسی ابن جعفر حالینه بیر آنیده

ساخلادی سبط رسولی اون بیر ایل زندانیده

بیر بیله ظلم ایتمدی اعدا امام صادقه

ایتمرم سند ابن شاهک ایلین ظلمی بیان

نیلدی بولمم او شاهه آه یا صاحب زمان

سسلدی ظالم غریبم باغریمی چوخ ایتمه قان

نسگل اولدی بو غم عظما امام صادقه

حیرتیم وار جور و ظلم گردش دورانیدن

دورت نفر حمّالیله نعشی چخوب زندانیدن

روز و شب دویماز ‹‹کریمی›› ناله و افغانیدن

آغلار ایلر گوزیاشین اهدا امام صادقه

شاعر : استاد کریمی مراغه ای

بیشتر بخوانید::

متن و جملات تسلیت شهادت شیشمین امام شیعه جعفر صادق (ع)

۷ شعر ترکی احوالات شب شهادت امام جعفر صادق از شاعران ترک زبان

شعر و دوبیتی ترکی شهادت امام جعفر صادق اثر مرحوم حسینی


شعر شهادت حضرت امام جعفر صادق (علیه السلام)

ایدوبدی رحلت امام صادق

بو گونده عالم سراسر آغلار

آچوبدی باشین آناسی زهرا

دیر اوغولوای مکرّر آغلار

بو غمده جدّی پیمبر آغلار

نه تک آناسی آچوبدی باشین

بو غمده نی تک گلوب نوایه

یتوب مصیبت امام عصره

آچوب یخاسین باتوب عزایه

دوتوبدی عرش برینده ماتم

گوی اهلی شیون سالوب سمایه

بو غمده جبریل اولوب نواخوان

گلوب فغانه ملکلر آغلار

گرکدی شیعه اولان بو گونده

غریق بحر مصیبت اولسون

توکوب عذاره سرشک چشمین

بو غمده قلبی غمیله دولسون

فغانه گلسون بو شاه دینه

اورکدن ایتسون نوا پوزولسون

نجه که زهرا سیزیلدار آغلار

اولوب پیمبر مکدّر آغلار

غم و ملالی بو شهریارین

چتیندی گلسون بیان حاله

او ظلملر که ایدوبدی منصور

سالاندا هر تک تکین خیاله

اورک اولور قان، یانور وجودیم

بو غملی گوگلوم باتور ملاله

اودور که قانیاش توکر عذاره

مصیبتینده بو گوزلر آغلار

کفایت ایتموب او قدری ظلم و

جفایه منصور او مرتد و شوم

بیر اود سالوبدی جهانه آخِر

ایدوبدی جبراً او شاهی مسموم

گینه اُلنده عیالی دوتدی

عزاسین اولدی غمینده مغموم

ولی حسینه بو نسگل اولدی

او نسگل اوسته پیمبر آغلار

نه سویدی جسمین عدو نه ایتدی

جلالین آخِر اُلنده تالان

ولی حسینین سویولدی رختی

قالوبدی جسمی قوم اوسته عریان

وورولدی باشی سر سِنانه

عیالی اولدی اسیر عدوان

خرابه لرده قوری یر اوسته

دوتوب عزاسین حرملر آغلار

نجه خرابه نه نوعی منزل

نه چکدی اوردا بنات زهرا

نه قدری ظلمه دایاندی زینب

نه نوعی دوزدی رباب و لیلا

علی قیزیندا تحمّله باخ

او کان صبره ایله تماشا

تمام صبری وجوده گَتدی

او صبره قوم ستمگر آغلار

اولار که جدّی حبیب داور

ایدوبدی عرش خدایه معراج

قالوردی شامین خرابه سینده

قوری یر اوسته گجه گونوز آج

رقیّه صبرین سپاه محنت

هجومی آخِر ایدوبدی تاراج

اُلوب او یرده اونون او حالین

دل ایلدوقجا مصوّر آغلار

نه قدری «عاصی» وار الده فرصت

بو دودمانه سن ایله خدمت

ویرلّه اجرون ایکی جهاندا

اولورمی نوکر بدون اجرت

بو مصرعی یاز دوباره آغلا

توک عارضیوه سرشک حسرت

ایدوبدی رحلت امام صادق

بو گونده عالم سراسر آغلار

شاعر : مرحوم عاصی

بیشتر بخوانید::

۴ شعر ترکی غمگین از احوالات شهادت امام جعفر صادق

۶ شعر غم انگیز از احوالات شهادت امام جعفر صادق (ع)

سینه زنی شهادت امام علی (ع) از میثم مطیعی (متن و دانلود نوحه)


شعر ترکی شهادت حضرت امام جعفر صادق (علیه السلام)

آغلا قان آغلا گوزوم عالم بوگون مغموم اولوب

صادق آل محمّد ظلمیله مسموم اولوب

غملنوب بو گونده عالم- سنده آغلا ساخلا ماتم

جنّت ایچره باش آچوبدور مصطفی و مرتضی

وای اوغولوای سسلیوب ایلر نوا خیرالنّسا

جای بهجت روضه ی رضوان اولوب ماتم سرا

انبیا و اولیا بو غصّه دن مهموم اولوب

بو شهین گر چکدیقی محنتلری تقریر اولا

قورخورام بو آه آتش باریم عالمگیر اولا

گر یازا مین اهل دل ممکن دگول تحریر اولا

شرح حالینده او سوز که مقتله مرقوم اولوب

چوخ جفا ایتدی اوز عصرینده بو شاهه اهل کین

چکمدی ظلم و ستمدن ال گروه مشرکین

عاقبت ناچار اولوب بیر اولوب خانه نشین

گون به گون خلقه ولی حقّیّتی معلوم اولوب

اهل حقّه راه حقده اولدی بیر نوعی سراج

حکم دین احکام شرع مصطفی تاپدی رواج

اولدی منصورین گوزینده روز روشن لیل داج

اوز هوای نفس شومین نفسینه محکوم اولوب

دوشدی بو فکره که سوندورسون او نور مطلقی

بیر نچه تدبیر ایدوب قتلینده اول شوم و شقی

زهریله مسموم ایدوب آخِر امام بر حقی

یاندی اکبادی، حیاتیندن او شه محروم اولوب

گرچه مقتول اولدی زهریله بو شاه ممتحن

ویردی اوز اوغلی ولیکن غسلینی، ایتدی کفن

قویدی قبره، بیله دور شرع خدای ذوالمنن

دفن فوری امردور، شرعاً بیله مرسوم اولوب

آه یا صاحب زمان، افسوس یابن العسکری

دفن اولونمادی ندن جدّون حسینین پیکری

گون قباقینده قالوب اوچ گون وجود اطهری

گور حسین تک کیم بو عالمده بیله مظلوم اولوب

دفنینون آلسان خبر علّت اگر تاخیرینه

وار نچه سرّی که عاجزدی قلم تحریرینه

کوفه ده سجّادی گور، باخ بوینونون زنجیرینه

نیلسون سجّاد، اسیر اشقیای شوم اولوب

گلدی اوچ گوندن صورا اوغلی او فخرُ السّاجدین

شاه عطشان نعشینی دفن ایلدی زار و غمین

بیر کفن ایتدی کفنسیز شاهه اول هادی دین

نه کفن گور جدّیوه اکفانیدن محتوم اولوب

بیر حصیری که اونا غارتگران بی حیا

خیمه سین تاراج ایدنده ایتمه میشدی اعتنا

اولدی اول جسمه کفن که ذات حقدور خونبها

حق اوزی بیر بیله مظلومیّته مغموم اولوب

عاصیا چوخ سُفله پروردور بو چرخ کجمدار

محترم اشخاصی دائم ذلّته ایلر دچار

بو دنی دنیانین اولما اهلینه امّیدوار

گورموسن مهر و وفا بو خلقیدن معدوم اولوب

شاعر : مرحوم عاصی


شعر شهادت حضرت امام جعفر صادق (علیه السلام)

حضرت صادق اولوب مسموم رحلت ایلدی

جعفری مذهب لری غرق مصیبت ایلدی

بیر وجودیکه وجود پاکی سرّاللهیدی

علم کان و مایکوندان سربسر آگاهیدی

سایه ی قدسی صراط المستقیمه راهیدی

منطقیله دوز یولا خلقی هدایت ایلدی

بیر وجودیکه یوزی آئینه ی ایمانیدی

هیکل توحید یزدان ناشر قرآنیدی

چرخ حکمتده جمالی نیّر تابانیدی

باتدی احبابین گوزینده کونی ظلمت ایلدی

بو امامین دین اسلامه اولوب چوخ خدمتی

قویمادی اولسون پریشان دین حق جمعیّتی

ایلدی تعلیم اهل دینه فقه و حکمتی

محضریندن چوخلاری تحصیل حکمت ایلدی

گوردی منصور ایلوری دین کسب نور اول خوردن

اول سیه دل قصد ایدوب سالسون او هوری نوردن

چکمدی ال سرور مظلوم دل رنجوردن

ظلمیله هر لحظه اظهار عداوت ایلدی

باخمادی ظالم سینار قلب پیمبر شیشه سی

دمبدم اولدی امامین قتلینه اندیشه سی

حجّت اللهه اذیّت ویرماق اولدی پیشه سی

نچّه دفعه حجّت اللهه جسارت ایلدی

بیر گجه احضار قیلدی ماسوا مولاسینی

ئولدوروب دنیایه سالسون شیعه واویلاسینی

ایلدی اوچ دفعه عریان تیغ خون پالاسینی

غیظیله اول شهریار دینه جرات ایلدی

گوردی چوخ محزون مقابلده دوروب خیرالبشر

حالی پوزقون ایلوری منصوره غیظیله نظر

سویلوری ال چک بالامدان ای لعین بدگهر

تیتردی اعضاسی ازبس خوف و وحشت ایلدی

ایتمه دی جرات ایده ظاهر نهان تدبیرینی

بولدی مشکلدی دگیشسین بنده حق تقدیرینی

اول شقی قویدی غلافه تازه دن شمشیرینی

دوتدی یوز اول شاهه اظهار محبّت ایلدی

بوردا رفتار ایتدی گرچه شاه دل رنجوریله

فکر قتلیندِیدی امّا کینه ی مستوریله

ایلدی مسموم آخِر زهردار انگوریله

زهر کین اول شاهدن تاراج طاقت ایلدی

زهر کین سالدی ایاقدان شامه دوندی گوندوزی

بیر خدا بولدی امامین حالینی بیرده اوزی

یتدی آفت گل کیمی سولدی سارالدی گل یوزی

گلشن عمرین اجل گلچینی غارت ایلدی

گوزلرین یومدی او دم که جومدی بحر رحمته

اوغلی موسی ویردی غسلین یاندی نار حسرته

شانینه لایق کفن ایتدی او صاحب عزّته

عزّتیله اوز آتاسین صاحب عزّت ایلدی

بو کفن بو دفن بو ذکر مصیبتدن خدا

یاده دوشدی دفن و کفن خامس آل عبا

گلدی سمت کوفه دن بیمار دشت کربلا

شاه عطشان دفنینه اقدام او حضرت ایلدی

گوردی میدان بلا بیر عشق میدانگاهیدور

هر مریض و درد عشقه عشق درمانگاهیدور

قوچ قوزی قربان دوشوبدور عشق قربانگاهیدور

هر یارالی جسم اونا بیر غم حکایت ایلدی

‹‹تائبا›› پابند دستور امام صادق اول

بو حنیفه خصلته دل ویرمه صاف و صادق اول

شیوه ی هشّامی دوت تحصیل علم ایت ناطق اول

تاپ شرافت او نجه کسب شرافت ایلدی

شاعر : مرحوم تائب

بیشتر بخوانید::

۵ متن نوحه سینه زنی شهادت امام جعفر صادق از مداح محمود کریمی

۷ متن نوحه سینه زنی شهادت امام جعفر صادق از مداح میثم مطیعی

۷ شعر ترکی از احوالات شب شهادت امام جعفر صادق (ع)


شعر ترکی شهادت حضرت امام جعفر صادق (علیه السلام)

جان فداحق مکتبینده پیروان قرآنا

بوذرومقدادوعماره شرفلی سلمانا

معرفتلی بوبصیره جابرابن حیانا

علمی نشرائتدی جهانه باقروصادق امام

علم سیزبومکتبه یول تاپماق اولمازوالسلام

جعفری مذهبلری وهابیلارتکذیب ائدیر

شیعه هریئرده تیکیرگنبداولارتخریب ائدیر

بونه قانوندی جنایت پیشه لرتصویب ائدیر

ای ائمه دشمنی ئول ایله سین قلبین ورم

شیعه لرقلبینده وارواللهی میلیونلارحرم

جعفری مذهب اگروعده وئره ائتمزخلاف

سعی ائدرتاگئتمیه عالمده راه انحراف

جعفری مذهب مذاهب ایچره سالمازاختلاف

قول مولادور ملاک شیعیان جعفری

دافعه حداقلی جاذبه حداکثری

جعفری مذهب ائدروحدت مرامین تقویت

حق دئیرحق یول گئدربامنطق وبامعرفت

مکتب عترتده دی آسایش انسانیت

هوشیاراول شیعه قوی چیخسین اجانب گوزلری

عین قرآندورسنه نهج البلاغه سوزلری

جعفری مذهب گئدرعلم ئورگشرعارایلمز

نفسیوی سیندیرسوروشماق هئچ کسی خوارایلمز

عالم اول مولائوزینه جاهلی یار ایلمز

علمیده فکرائتمه بیرکس پایه ی عترتده دی

معرفت اهلی عموماسایه ی عترتده دی

حضرت صادق حضورینده بیرعده شیعیان

اگلشیب ائیلیردیلرکسب علوم بیکران

بیرجوان اول مجلسه وارداولوبدورناگهان

احترام ائیلوب امام صادق اول مه طلعته

دوتدی یوز بعداهمان جمعه دل آچدی صحبته

سویلدی ای شیعیان مکتب آل عبا

دقت ائیلون بوجوانه باوفادور باصفا

باش اگین فرمانینه سیزکشتی سوزبوناخدا

ناخداسیزکشتی نی دریاده طوفان غرق ائدر

شیعیان جعفری الله دئین یولدان گئدر

بیرخراسانی گلیب بیرگون حضورحضرته

عاشقانه باشلادی لحن عربلن صحبته

وقت اولوب آلسین جوابین باخ علوم وحکمته

حجت ذات احدعلامه عالی جناب

فارسی لهجیلن خراسان اهلینه وئردی جواب

ایلدی مهمان تعجب عرض ائدیب ای مقتدا

نه گوزل ایرانیلارتک ائیلوسوزصحبت آقا

سویلدی حضرت تعجب ایلمه ای آشنا

بیزالهی علمیله کسب فضیلت ائیلریق

نه فقط ایران هامی بیر دلده صحبت ائیلریق

حمدلله اهل ایران حیدری دور حیدری

حیدری لر کنزعشقه مشتری دور مشتری

مذهبی یاران عشقین جعفری دور جعفری

جان فدااولسون بیله استاده بیله مکتبه

حضرت صادق آقابنیانگذار مذهبه

جعفری مذهب عملده خالص ائیلرنیتین

لکه دار ائتمزجهاندا مکتب حریتین

آبرو ساخلار آپارمازهئچ کسین حیثیتین

شیعیه قانون یازیبدی جعفرصادق مرام

آبرووئرماق گوزلدی آبروتوکماق حرام

جعفری مذهب گرک تاپسین ره توحیدینی

انتخاب ائتسین قباقجامرجع تقلیدینی

یوخسادیندن دوندررابلیس انسان دیدینی

اول جوانلیقدان دلا غواص بحر معنوی

شرعی تکلیفین اوخی قوی اولسون ایمانین قوی

جعفری مذهبلری قورخوتماق اولمازجنگیدن

دشمن پسته دئنن گئچ بوعبث آهنگیدن

هنگ غیرت درس آلیب عباس تک سرهنگیدن

گرعدوعزم ائیلیوب شیپورحمله چالماقا

جیش حق آماده دی اشراری تختدن سالماقا

جعفری مذهبلره صادق امام ائیلوب بیان

سعی ائدین زینت اولون بیزاهلبیته شیعیان

مایه ی خفت نبایداولسون احرارزمان

بیزهمین یولداهمین مکتبده دین همرازی ییق

گئچمیشیق جاندان حسین بن علی سربازی ییق

جعفری مذهبلرین محکمدی الده مدرکی

حضرت صادق ئوزی ترویج ائدیب بومسلکی

کعبه احرامیندن افضلدی محرم کوینکی

کعبه اولدی قبله اما کربلا قبله نما

گئی قرا وور سینوه پاینده قالسین کربلا

شاعر : استاد کلامی زنجانی


شعر شهادت حضرت امام جعفر صادق (علیه السّلام)

ظلمده طغیان ایدوب منصور یا صاحب زمان

اولدی جدون قتلینه مآمور یا صاحب زمان

گوردی جدون جعفر صادق اولوب دین استتار

ایستیوب الله اکبر تا دیولسون آشکار

دین اسلام اوسته چکدی رنج و زحمت بی شمار

گلدی آخرده اله منظور یا صاحب زمان

چکدیقی زحمت لریندن یتدی بو منصب بیزه

ایمده عالمده دیوللر جعفری مذهب بیزه

رشگ ایدور بیگانه لر دنیاده روز و شب بیزه

اولموشوخ چون گون کیمی مشهور یا صاحب زمان

ویردی درس دین بیزه خیر ایشلری ترک ایتمیون

یاتمیون فرمایش پیغمبری ترک ایتمیون

امر به معروف ونهی از منکری ترک ایتمیون

اهل دین چکسون گرک هر جور یا صاحب زمان

دین گلوب آسان اله چون بولموروق بیز قیمتین

ساخلاسون هر کس گرک اسلام و دینون حرمتین

بولمسه دنیاده هر کیم قدرین اسلامیتین

خلق آرا آخر اولور منفور یا صاحب زمان

بو همان دیندور که بو دین اوسته صاق صولار دوشوب

جسم لردن قان آخوب قاندان یره یولار دوشوب

خیمه لر تالان اولوب باشلار گیدوب قولار دوشوب

تشنه حنجرلر اولوب منحور یا صاحب زمان

باخمیوبدور حضرت صادق ایدوللر سرزنش

آچدی بیر دانشگه اسلامی اول طاها منش

ویردی دانشگهده شاگردان دینه پرورش

وار آدی تا پای نفخ صور یا صاحب زمان

بولدی لازم دین یولوندا اهتمام ایتسون گرک

جدی شاه کربلا تک تا قیام ایتسون گرک

حق یازان برنامه دینی تمام ایتسون گرک

شوریلن دنیایه سالسون شور یا صاحب زمان

گوردی آی تک گیزلنوبدور ابرده آیات حق

هر گیجه گوندوز ایدوبدور خلقه تبلیغات حق

ایلیوبدور حقیله نا حق لره اثبات حق

قویمیوبدور حق اولا مسطور یا صاحب زمان

گوردی منصور دنی اجلالینه رخنه یتور

گوندروب پیغام امامه ایشلروندن ال گو تور

عالم ایچره اول جفا پرور ریاستدن اوتور

جام کبریله اولوب مخمور یا صاحب زمان

ایستیوبدور سوندوره شمع هدایت نورینی

یغدی خلقی باشه بولدورسون اورک منظورینی

گور نجه دنیا ایدوب مغرور یا صاحب زمان

امر ایدوب اولسا امام مسلمین هر حالیده

جلب ایدون جبریله فکریم قالماسون اشغالیده

شاه دینه گوندروب مآمور یا صاحب زمان

گلدیلر مآموریلر بولموبله راز اوستونده دور

گوردولر اول پیشوای راز و نیاز اوستونده دور

باخمیوبلر سجدده راز و نیاز اوستوند ه دور

ایلیوبلر گیتماقا مجبور یا صاحب زمان

قویمیوبلر تا عوض ایتسون لباسین شاه دین

پا برهنه باش آچوخ پوزقون پریشان دل غمین

گتدیلر اول حالیلن زیبنده دی بو جور و کین

قلب زهرانی ایده رنجور یا صاحب زمان

گلدی منصوره سلام ایتدی ولی داد گر

اعتنا ایتموب ایاق اوسته قالوب فخر بشر

ایتدی بیر ساعت صورا مظلوم امامه تا نظر

گوزلری ای کاش اولیدی کور یا صاحب زمان

گردش ایامه باخ کابینه شورایه باخ

حاکم و محکومه باخ فرمانه باخ ایذایه باخ

ظالم و مظلومه باخ مآموره باخ دنیایه باخ

خار الینده گل اولوب مقهور یا صاحب زمان

ناقه دینی او ظالم ظلم الیله پیلدی

دلده بغض و کینه سین مجلسده ظاهر ایلدی

منده یوخ جرآت دیوم اول کینه پرور نیلدی

دوت منی بو شرح دن معذور یا صاحب زمان

گرچه خلق ایچره اولوبدور « اعظمی» نامیم منیم

غصه دن لبریز دور اما گوگل جامیم منیم

لطف ایله تا بنده اولسون کوکب کامیم منیم

ایلسون خالق منی مآجور یا صاحب زمان

شاعر : مرحوم اعظمی تبریزی


این مطلب چقدر مفید بود ؟
 

دیدگاه ها

شما هم می توانید نظرات خود را ثبت کنید



کد امنیتی کد جدید
hits

آخرین مطالب دلگرم

StatCounter